مارچ 05, 2021

د اسلامي امارت له ویاند محترم ذبیح الله مجاهد صاحب سره د شریعت مجلې مرکه

د اسلامي امارت له ویاند محترم ذبیح الله مجاهد صاحب سره د شریعت مجلې مرکه

مرکه کونکي: اکرم تاشفین او سید عبدالرزاق

شریعت:په امریکا کي دادارې بدلون او دنوي اولس مشر په راتګ سره ډيری بدلونونه لیدل کیږي،تاسو دا بدلونونه څنګه ارزوئ؟ فکر کوئ چې دا بدلونونه به د امریکا او اسلامي امارت په اړیکو منفي اغیز وکړي؟

ذبیح الله مجاهد: حامد ومصلیا امابعد! په امریکا کې داولس مشر او ادارې په بدلون سره ممکن بدلونونه رامنځ ته شي،ولي د اسلامي امارت او امریکا ترمنځ تړون یوه بیله مسئله ده چي موږ ورته استثنائي ویلی شو؛ځکه ددوحې تړون یوازي د امریکا یوه سیاسي ټیم نه ده لاسلیک کړی بلکه یاد تړون دهغو ټولو امریکایي سازمانانو او ادارو په شرکت او اتفاق سره رامنځ ته شو کوم خلک او ادارې چي دامریکايي ګټو په رڼا کي راتلونکی ټاکي او پالیسیاني جوړوي.

 تاسو پوهیږئ چي په هیواد کي یوه اداره داسي وي چي د سیاسي چارو چار سنبالنه او قوانین وضع کوي.خو ځیني بیا داسي اداري وي چي دهیواد لپاره زیاتي مهمي وي کومي چي د هیواد پالیسي تشکیلوي.

موږ چي د امریکایي جهت سره په مذاکراتو بوخت و نو د ستراتیژیکو ادارو نمائندګان به په مستقله توګه موجود و،د دوحې تړون هم یو ستراتیژیک تړون و،د امریکا تر ټولو اوږدې جګړې ته دپای ټکی ایښودل او افغانستان کې یو اسلامي نظام قائمید یې اساسي هدفونه دي.

د همدې تړون له لاري امریکا له تر ټولو اوږدې جګړې څخه د خلاصون او زیانونو د جبیرې  هدف ته رسیږي او افغانان خپله آزادي تر لاسه کوي، چې په نتیجه کې به یې د ټولو افغانانو له لوري ګډ اسلامي نظام منځ ته راځي

بل لوري ته  موږ کوښښ دا و چي ددوو لسیزو راهیسي چي پر افغانستان کوم اور بل دی او داستعمار تسلط دی هغه باید ژر تر ژره پای ومومي ،نور باید سولییز ژوند راشي،موږ په دې عقیده یو چي دامریکا نوې اداره او نوی اولس مشر به هم د زاړه حکومت لار غوره کړي؛ځکه چي په هماغه لار کي دامریکا ګټه او هماغه د امریکا ستراتیژي ده،په یاد تړون کي هغه ټول خلک شریک وو کوم چي دامریکا پالیسي تشکیلوی.

خو که بالفرض دوی غلطه پریکړه وکړي او تړون مات کړي یا تاخیر پکي راولي نو لومړی نقصان به یې خپله امریکا ته وي، دا جنګ اوس د امریکا تر وس وتلی دی، د جنګ د تمدیدله امله به د امریکا اقتصاد هم مشغول شي،د امریکا حیثیت به متاثر شي او په تاوانو کي به یې له شک پرته زیاتوالی راشي، دا فطري خبره ده چي افغانان به خپل هیواد آزادوي،دا آزادي که په تړون ممکنه نه وي خو بیا هم د دوی اول او اخر آرمان همدا آزادي تر لاسه کول دي .

که دوی تړون نقض کوي نو موږ هم خپله مجبوري لرو،هغه داچي موږ آزاد هیواد غواړو، خو چي دوی په سمه توګه موږ آزادي ته نه پرېږدي نو موږ به یې د جنګ په وسیله ازادو، خو دا به د امریکا لپاره ستر تاوان وي ځکه موږ دا ګمان نه کوو چي امریکا به تړون نقض کړي اوس هغوی ته تجربه شوې او تېر شل کاله ددوی لپاره ښه سبق و.

شریعت:په رسنیو کي داخبر کښته پورته کیږي چي امریکا تړون دسره ارزوي،تاسو دې خبری ته څنګه ګورئ؟

ذبیح الله مجاهد:هو بالکل داسي خبري موږ اورو،خو د دې خبري وضاحت خپله د امریکا وزیر خارجه په یو مطبوعاتي کانفرانس کي وکړ،هغه داچي نوی حکومت د دوحې د تړون په هکله ځان ته پوهاوی حاصلوي چي امریکا ته کوم مسئولیتونه راجع دي؟ د تړون په هکله پوهاوی د امریکایي حکومت حق دی،نو ځکه نوې اداره هم ځان ته دغه پوهاوی، شرائط او مندرجات حاصلوي.

 دتړون د ارزوني مطلب دا نه دی چي دا تړون به نقض کیږي او سره به پرې غور کوي یا به نوي مذاکرات کوي، ددې لپاره موږ هیڅکله تیار نه یو او نه داسي کړنه موږ ته د منلو ده، موږ غواړو چي تړون عملي کړو او څوک چي سرغړونه کوي تاوان به یې هغه ته راجع کیږي، طبعي خبره ده په دې تړون اتلس میاشتي تیري شويدي،اوس تکمیل شوی دی،په دې کي د هیڅ کوم بدلون اوس ګنجایش نشته.

 دامریکا نوې اداره که له ارزوني دا مطلب اخلي چي پوهاوی حاصل کړي،مطالعه یې وکړي،خپل او زموږ شرایط وګوري نو داخو سمه خبره ده او که مطلب داوي چي دا تړون نقض او نوی رامنځ ته کړي نو دا به دیو نوي جنګ تابیا وی.

شریعت: امریکا او کابل اداره ادعا کوي چي طالبانو د دوحې تړون شرایط نه دي عملي کړي،نو کوم شرایط دی چي د دوی په خبره اسلامي امارت تر اوسه نه دي عملي کړي؟

ذبیح الله مجاهد:داخبره ناسمه ده چي موږ د تړون شرایط نه دي عملي کړي،د دوحې تړون لومړی شرط دا و چي د افغانستان له خاوري به امریکا او د هغوی متحدینو ته کوم تاوان نه رسیږی،د دې لپاره موږ چمتو یو،څومره منطقه چي زموږ تر کنټرول لاندي ده د هغې په هکله موږ هیڅ یو چا ته اجازه نه ورکوو چي د امریکا او د هغوی د متحدینو په ضد یې وکاروي،او که موږ ټوله افغانستان تر واک لاندي راولو او په ټول هیواد کي یو نظام رامنځ ته کړو نو هغه نظام به هم پابند وي چي د افغانستان ځمکه د امریکا او د هغوی د متحدینو خلاف ونه کاروي او چاته به هم اجازه نه ورکوي، د تړون دوهم شرط داو چي امریکا به تر څوارلس میاشتو خپل ټول پوځیان له افغانستانه باسي،نو موږ د دې شرط عملي تطبیق ته هم انتظار یو،دا د امریکا مسؤولیت دی باید ترسره یې کړی.

 دتړون درېیم جز دا دی چي بین الافغان مذاکرات به شروع کیږي او هغه شروع شوي دي، څلورم بند داهم و چي بین الافغاني مذاکراتو کي به د اوربند مسئله هم مطرح کیږي او دې ته موږ تیار ی، موږ چي د بین الافغانی مذاکراتو لپاره کومه اجنډا تیاره کړې ده، مهمه برخه یې اوربند تشکیلوي، خو دا موضوع موږ اخر ته کړېده چي ترمخه یې یوې نتیجې ته ورسیږو.

دا څلور دتړون غټ ټکي دي،موږ د ټولو عملي کېدو ته ژمن یو،په جزوي توګه امریکا ځیني سرغړوني کړي دي،مثلا:ژمنه شوې وه چي ټول بندیان به په پنځلس ورځو کي خوشي کیږي ولي دا سلسله تر شپږو میاشتو وغځېده،د بین الافغانی مذاکراتو ژر پیلېدل وه خو تاخیر پکي وشو.

همدا رنګه امریکایي پوځیانو په ځینو منطقو کي بمبارۍ کړي دي،دا بمبار باید نه وي لکه څنګه چي موږ د دوی په کوم مرکز حمله نه ده کړې او دوی خپله دا اعتراف کړی نودوی هم باید ژمنتیا وښيي، زموږ له لوري حمله نکول زموږ د تړون عملي کېدو ته ژمنتیا په ډاګه کوي، په کابل اداره که زموږ لخوا حمله شوې وي نو د هغوی سره زموږ کوم تړون نشته،خو په دې مورد کي هم اکثره وخت اقدام د کابل ادارې کړی وي او موږ یوازي دفاع کړي وي، په روان کال کي موږ هیڅ ځای کومه غټه حمله نه ده کړې د دې لپاره چي د جنګ کچه ټيټه شي،کله چي د کابل ادارې عسکر زموږ منطقو ته راشي او ځای په ځای پوستې جوړوي،مراکز  فعالوي او زموږ څخه د منطقو د اخیستلو کوښښ کوي نو موږ محبوریږو چي دفاع وکړو،داسي حالت کي به جنګ کیږي او مسؤولیت به یې دوی ته راجع کیږي.

شریعت: په ځانګړې توګه هغه کوم شرطونه دي چي د امریکا لپاره یې پلي کول لازمي دي او دوی پرې څومره عمل کړی؟

ذبیح الله مجاهد:ما مخکي یادونه وکړه چي امریکا د تړون له مخي باید په څوارلس میاشتو کي خپل ټول پوځیان وباسي،په لسو ورځو کي یې باید پنځه زره بندیان خوشي کړي وای خو له بده مرغه دوی په کي خنډونه ایجادول ،د بین الافغاني مذاکراتو د پیل وروسته په دریو میاشتو کي پاته ټول بندیان د یاد تړون له مخي باید خوشي شوي وای خو امریکا خپله دا وعده تر اوسه نه ده پوره کړې، د بین الافغاني مذاکراتو له پیل وروسته په دریو میاشتو کي باید زموږ د مشرانو نومونه له تور او د جائزو له لیست نه ایستل شوي وای او کوم محدودیتونه چي دوی ته متوجه دي هغه باید ختم شوي وای خو تر اوسه لا هم امریکا دا برخه نه ده عملي کړې، له دې ور هاخوا مهمه دا چي امریکا ته د جنګ  سحنې څخه پرته په هیڅ صورت د بمبار اجازه نشته،په عامو خلکو د چاپو وهلو څخه ممنوع دي، او د دې سره سره د کابل ادارې ته هم دا اجازه نشته چي بمبار وکړي او په خلکو چاپې ووهي،په داسي حال کې چې  دوی له دغو ټولو شرطونو څخه سرغړوني کړي، بمبار یې کړی او عام خلک یې هدف ګرځولي دي.

شریعت: ایا د امریکا موخه داده چي د تړون موده وغځوي چي بین الافغاني مذاکرات یو نتیجې ته ورسیږي او په دوی کوم تور را نه شي؟

ذبیح الله مجاهد:اسلامي امارت د تړون د مودې د غځولو اجازه بالکل نه ورکوي،موږ خو په ډېره ګرانه څوارلس میاشتو ته اماده شوي یو،دا اتلس میاشتي خو د دې نکتې له امله مذاکراتو کې تېر شوي،موږ ډېر لنډ وخت کي خارجي ښکېلاک ایستل غوښتل، ځکه نو د تړون د مودې  ور هاخوا د یوې ورځي د تمدید اجازه هم نه ورکوو او دوی په هیڅ صورت دا حق نلري.

 دلته بله نکته دا مهمه ده چي بین الافغاني مذاکرات د افغانانو داخلي مسئله ده په امریکا پوري هیڅ تړاو نه لري،نو دوی باید خپلو وعدو ته ځیر اوسي او ښکېلاک ته خاتمه ورکړي،د اشغال تر خاتمې وروسته به افغانانو ته خپله موقع پیدا شي او دوی به خپلو کي یو جوړ جاړي ته ورسيږي او که امریکا دلته خپل شتون اوږد کړي نو کابل اداره به په مظلوم ملت خپلي ناروا غوښتني منل غواړي او دا به دیو لوی جنګ باعث شي؛ځکه نو باید امریکا پر تړون عمل وکړي او  جنګ ته  د پای ټکي اېښودلو په غرض تر ټاکل شوي نیټې خپل ټول پوځیان وباسي،اشغال باید نور ختم کړي،اسلامي امارت دوی ته ضمانت ورکوي چي د افغانستان ځمکه به د دوی په ضد نه کارول کیږي.

 د داخلي مسایلو لپاره به افغانان بین الافغاني مذاکرات په مخ بیایي چي په نتیجه کي به یې یو وسیع نظام رامنځته کیږي،کوم چي ټولو افغانانو ته برخه ورکوي او د سولي ضامن به وي.

شریعت: دسولي په راتګ کي دکابل ادارې تعامل څنګه دی؟

ذبیح الله مجاهد: تر اوسه خو د کابل ادارې تعامل ډېر د افسوس وړ دی،له شروع نه د دوی کوښښ بس دا و چي د دوحې تړون لاسلیک ترسره نه شي،خو دوی ځکه په دې هڅه کي له ناکامۍ سره مخ شول چي هلته زموږ له امریکا سره مخامخ رابطه او خبره وه،او هغوی بیا په هرحال تړون لاسلیک کول غوښتل،تر تړون وروسته د کابل ادارې تر هر ممکنه حده خنډونه ایجاد کړل،پنځه زره بندیانو خوشي کولو کي تاخیر،اوسني پاتي بندیانو په خوشي کولو کي خنډونه،په اجنډا کې  بې معنی بحثونه،او وخت ضایع کول یې په خورا پراخه پیمانه رامنځ ته کړه .

اوس هم د کابل ادارې مشر،مرستیال او اکثره منسوبین چي کله هم خبره کوي نو جنګ ته لمن وهي،د زور خبره کوي،د فشار راوړلو او عملیاتو خبرداری ورکوي،چي واضح مطلب یې د خبرو اترو د بهیر د ناکامۍ غوښتنه ده،چي نتیجه یې د وضعیت په خرابتیا تمامیږي،دا ځکه چي دا خلک د خپل قدرت دوام غواړي او هڅه کوي چي امریکا د دوی د ساتني لپاره همدلته پاتي شي خو د دوی دا فکر غلط دی ،ځکه افغانانو د اشغال د خاتمې او دلته دیوه سوچه اسلامي نظام د نافذولو هوډ کړی دی او دې موخي ته به رسیږي ان شاء الله .

څرنګه چي د امریکا سره ستونزي پای ته رسیږي او موږ د هغوی څخه یو طرف ته شو نو داخلي مسئلې به افغانان خپله حل کوي ،اوس که د چا خوښه وي یا نه وي،هیواد کې به سوله او ثبات راځي،دا د ملت فیصله  ده،په دې سره به  د کابل اداره تنها پاته شي،اوس د افغانستان ټول سیاسي جهتونه د کابل ادارې په ضد راپارېدلي دي.

شریعت: بین الافغاني مذاکرات اوس په کومه مرحله کي دي؟ څنګه روان دي؟

ذبیح الله مجاهد:مذاکرات خو یوه سلسله ده او روانه ده،ډېري مرحلې پکي تیري شوي او ډیري به مخته راشي،خو د خوښۍ خبره داده چي دواړه لوري د مذاکراتو په جاري ساتلو متفق دي،زموږ له لوري د مذاکراتو لپاره یو پياوړی او له بشپړ اختیاره برخمن ټیم ټاکل شوی او هلته شتون لري،د هغوی به پوره هڅه دا وي چي مذاکرات پر مخ لاړ شي او دا سلسله ناشوني پاته نه شي،که څه هم اوس د خبرو په جریان کي لږ ضعف راغلی ولي دا څه عجیبه خبره نه ده،په مذاکراتو کي دا راځي، خو موږ امید لرو چي دا بهیر به بیرته چټک شي،او ښې پریکړی به مخي ته راشي.

شریعت: دجنورۍ په ۲۵ مه داسلامي ملکونو د نړیوال تنظیم له طرفه اعلان وشو و چي راروان کانفرنس کي به اسلامي امارت ته هم بلنه ورکول کیږي او د افغانستان اړوند مسایلو به بحث کیږي،په دې اړه ستاسي موقف څه دی؟  

ذبیح الله مجاهد:کله چي د یاد تنظیم له لوري  مستقله او رسمي بلنه موږ ته را کول شي نو موږ به پرې غور کوو او د ورتګ یا نه ورتګ پرېکړه به کوو،تر اوسه خو داسي هیڅ خبره مخي ته نه ده راغلې،که  د کانفرنس اجنډا راشي او داجوته شي چي کانفرنس د افغانانو د ښېګڼي لپاره ده بیا به موږ هم تګ یقیني کړو.

شریعت: تازه د اسلامي امارت دوه لوړ پوړی هیئتونه د ایران او روس په سفر تللي وه،د دې سفرونو موخه او اهداف کوم دي؟

ذبیح الله مجاهد:دایران او روسیې سفرونه له هغې کړۍ نه دي چي موږ یې د افغانستان د نورو ملکونو سره د ښو اړیکو او دستونزو په حل کېدو کي غوره ګڼو،د دې لپاره چي متقابل احترام منځ ته راشي،د اعتماد فضاء جوړه شي،پر ځینو مسئلو ابهام لري کړای شي او چاته بې ځایه تشویش پاته نه شي.

د امریکا سره موږ هوکړه کړې،اشغال ختمېدونکی دی،نو موږ هڅه کوو چي راتلونکي کي چاته د افغانستان څخه څه اندېښنه نه وي،زموږ ګاونډي هیوادونه په اشتباه کي پاته نه شي،او څومره چي د دوی په وس کي وي چي د افغانستان د مسئلې په حل کي مرسته وکړي نو باید ویې کړي.همدا شان ایران کي زموږ لکونه مهاجرین اوسیږي،له ایران سره موږ ګډه پوله لرو ،د هغوی اړوند ستونزي وي، کله کله هلته بې ځایه ټکان کیږي،خلک په شهادت رسیږي، په یادو سرحداتو افغانانو ته سخت اذیت رسیږي،ایران میشتو افغانانو ته ډېر تکلیفونه را منځ ته کیږي، دا ټولي ستونزي او اندېښنې زموږ مخي ته وې او دغه زموږ هدف و چي دایران له حکومت سره پرې  بحثونه وکړو، له ایران سره مهمي مسئلې وڅېړو،او په تجارت او اقتصاد خبري وکړو.

دروسیې د سفر هدف هم دا و چي د روسیې سره زموږ اړیکو کي ښېګڼه راشي،د یو بل په اړه غلط فهمي رانه شي،د یو بل څخه خطر احساس نه کړو، دمرستي په وخت کي یو د بل مرسته وکړي،تجارتي مسائلو کي افغانانو ته اسانتیاوي ورکړي،او نور که څه نه وي نو دا چي زموږ په ضد دي څه ګام نه پورته کوي،لکه څنګه چي په تیرو شلو کلنو کي زموږ په ضد تبلیغات شوي دي.

 موږ غواړو چي نور هغه منفي تبلیغات ختم شي،یو مثبت فکر رامنځ ته شي.

له خارجي ملکونو سره ښو اړیکو ته افغان ملت اړتیا لري،موږ غواړو د هر هیواد سره تجارتي،سفارتي،او مدني اړیکي وساتو او یو بل ته متقابل احترام ولرو.

شریعت:له توجه مو یو جهان مننه.

ذبیح الله مجاهد: له تاسو هم مننه.

 السلام علیکم

Related posts